Në një atmosferë mikpritëse dhe frymëzuese, maturantë nga Shkodra, por edhe nga qytete të tjera të Shqipërisë dhe rajonit, u bënë pjesë e kësaj dite të veçantë, duke vizituar ambientet universitare, duke u njohur nga afër me programet e studimit dhe duke bashkëbiseduar me pedagogë dhe studentë të UNISHK.
Para godinës së Rektoratit, në një ambient tashmë të rinovuar nga Bashkia Shkodër, Rektori Tonin Gjuraj theksoi rëndësinë e kësaj dite si një moment kyç për të rinjtë, një pikëtakim mes ëndrrave dhe vendimeve që do të formësojnë të ardhmen e tyre. Universiteti u prezantua jo vetëm si një institucion arsimor, por si një hapësirë zhvillimi, ku idetë marrin jetë dhe ambiciet kthehen në realitet.
Në vijim të aktivitetit, përshëndetën Nënkryetarja e Bashkisë Shkodër, Teuta Qyteza, si dhe Drejtorja e ZVA Shkodër, Brisela Kadija, të cilat ndanë mesazhe inkurajuese për maturantët dhe theksuan rëndësinë e bashkëpunimit institucional në funksion të arsimit cilësor.
Ky aktivitet u zhvillua njëkohësisht edhe në Fakultetin e Gjuhëve të Huaja (FGJH), Fakultetin e Shkencave Shoqërore (FShSh), Fakultetin Ekonomik (FE), Fakultetin e Shkencave të Natyrës (FShN), Fakultetin e Drejtësisë (FD) dhe Fakultetin e Shkencave të Edukimit (FShE).
Kjo nismë përbën një risi për Universitetin e Shkodrës “Luigj Gurakuqi” dhe synohet që të kthehet në një traditë të përvitshme, duke krijuar një urë të qëndrueshme komunikimi mes universitetit dhe brezit të ri të studentëve.
