Në kuadër të projektit Erasmus+ MIC Albanie, disa studentë francezë nga Fakulteti i Gjuhëve dhe Shkencave Humane të Université de Haute-Alsace po ndjekin leksione pranë programit të studimit Bachelor “Gjuhë frënge” në Universitetin e Shkodrës “Luigj Gurakuqi”.
Prof. Dhurata Hoxha, koordinatore e projektit, tregon se studentët e dy universiteteve po punojnë së bashku në projekte pedagogjike dhe ndërkulturore, që trajtojnë:
të folurin e të rinjve në gjuhën frënge,
kënaqësinë e të lexuarit,
rëndësinë e mobilitetit si urë për njohjen e Tjetrit.
Përvoja të tilla, falë vizionit dhe angazhimit të pedagogeve të gjuhës frënge, po krijojnë mundësi konkrete për studentët:
përmirësim të aftësive komunikuese e kulturore,
zhvillim të metodologjisë kërkimore,
punë në rrjet me studentë europianë.
Këto iniciativa po e vendosin UNISHK në hartën e bashkëpunimeve akademike frankofone, duke rritur ndërkombëtarizimin dhe njohjen e tij në botën universitare franceze dhe më gjerë.
Në veprimtaritë e organizuara morën pjesë edhe maturantë nga gjimnazet e Shkodrës, duke nxitur interesin për studimet në gjuhën frënge në Universitetin e Shkodrës.
