Trajnimi me temë Ethical Decision Making

Më datë 25 mars 2025, në ambientet e Qendrës SMART në kuadër të Business Hub – SIC-SBH, në Fakultetin Ekonomik të Universitetit të Shkodrës “Luigj Gurakuqi”, u zhvillua trajnimi me temë Ethical Decision Making, i udhëhequr nga Prof. Gina Dutro, ligjëruese e asociuar pranë Miami University, SHBA.
Ky aktivitet u organizua nga IJR Student Shkodër në bashkëpunim me SMART Business Hub dhe SMART Innovation Centres të Fakultetit Ekonomik dhe pati në qendër të vëmendjes një temë thelbësore për formimin profesional dhe akademik të studentëve – zhvillimin e aftësive për marrjen e vendimeve etike në mjedisin e biznesit dhe financave.
Trajnimi u karakterizua nga një qasje interaktive dhe përfshiu pjesëmarrjen aktive të studentëve dhe stafit akademik. Gjatë sesionit, u trajtuan çështje kyçe që lidhen me etikën në vendimmarrje, përfshirë:
•    Identifikimin dhe analizimin e dilemave etike që shfaqen në praktikën profesionale;
•    Aplikimin e teknikave dhe strategjive për të marrë vendime të bazuara në parime të forta morale dhe profesionale;
•    Rëndësinë e transparencës dhe integritetit në ndërtimin e një kulture etike në vendin e punës;
•    Analizimin e rasteve konkrete që mundësojnë kuptimin dhe aplikimin e koncepteve etike në fushat e financës, menaxhimit dhe biznesit në përgjithësi.
Prof. Dutro, me përvojën e saj të gjerë ndërkombëtare në fushën e edukimit dhe etikës profesionale, ndau me pjesëmarrësit perspektiva të vlefshme dhe praktika të zbatueshme që synojnë fuqizimin e kapaciteteve etike të individëve dhe organizatave.
Ky trajnim shërbeu si një platformë e rëndësishme reflektimi dhe shkëmbimi idesh për studentët e profileve të ndryshme të Fakultetit Ekonomik, të cilët jo vetëm përthithën njohuri të reja, por u përfshinë në diskutime dinamike që nxitën mendimin kritik dhe vetëdijen profesionale.
Aktiviteti rezultoi tejet frymëzues dhe me ndikim pozitiv për pjesëmarrësit, të cilët tashmë janë më të përgatitur për të përballuar sfidat etike që i presin në karrierën e tyre profesionale. Mirënjohje të veçantë për angazhimin dhe pjesëmarrjen aktive të të gjithë kontribuesve.