Në kuadër të transparencës dhe komunikimit të hapur me institucionet sociale, Rektori Gjuraj mirëpriti sot Kryemyftiun e Shkodrës, imam Muhamed Sytari.
Kryemyftiu Sytari i uroi Rektorit Gjuraj suksese në detyrën e tij dhe i shprehu mbështetjen e sinqertë për veprimtarinë akademike dhe sociale të universitetit. Takimi u zhvillua në një frymë mirëkuptimi dhe bashkëpunimi , duke shënuar një hap të rëndësishëm në ndërtimin e urave lidhëse midis UNISHK dhe institucioneve fetare, duke ruajtur parimin e laicitetit si vlerë thelbësore e institucionit.
Gjatë bisedës, Rektori Gjuraj vlerësoi rolin e fesë islame në promovimin e vlerave shpirtërore, humanizmit dhe empatisë. Ai theksoi gjithashtu kontributin e shquar të personaliteteve nga komuniteti mysliman në fusha të ndryshme, si arsimi , arti , kultura dhe shkenca , duke evidentuar ndikimin e tyre pozitiv në qytetërimin shqiptar dhe më gjerë.
Kryemyftiu dhuroi disa libra për Biblioteka Shkencore e Universitetit "Luigj Gurakuqi" Shkoder.
Ky takim pasqyron angazhimin e Universitetit të Shkodrës për të forcuar marrëdhëniet me aktorët e ndryshëm të shoqërisë, duke promovuar dialogun ndërinstitucional dhe vlerat e përbashkëta që kontribuojnë në zhvillimin e komunitetit.
