Rektori Gjuraj priti sot në një takim të veçantë dhe miqësor ish-rektorin e UNISHK, Prof.asoc.dr. Gjovalin Kolombi, i cili drejtoi universitetin nga viti 1992 deri në 1997. Takimi u përqendrua në kontributin e jashtëzakonshëm të Prof. Kolombit në zhvillimin e universitetit dhe krijimin e bazave për një institucion të hapur dhe të orientuar drejt shkollës perëndimore. Nën drejtimin e tij, u arritën bashkëpunime ndërkombëtare me universitete prestigjioze si Graz, Ilinois i Jugut dhe Firenze, duke kontribuar në rritjen e ndikimit dhe suksesit të UNISHK-ut.
Angazhimi i Prof. Kolombit në krijimin e Zyrës së Marrëdhënieve me Jashtë pati një ndikim të madh në mundësitë për mobilitet dhe zhvillim për personelin akademik. Kjo zyrë ka krijuar mundësi të shumta dhe ka ndihmuar në forcimin e lidhjeve ndërkombëtare të universitetit.
Në nivel personal, Prof. Kolombi është një mentor dhe mbështetës i shquar për shumë individë, duke përfshirë ata që kanë kontribuar në përparimin e universitetit. Në përmbyllje të takimit, Rektori Gjuraj shprehu mirënjohje dhe respekt të thellë për figurën e Prof. Kolombit dhe për mbështetjen që ai ka ofruar për karrierën akademike të shumë personave dhe për rolin kyç që ka luajtur në ngritjen e strukturave të rëndësishme të universitetit.
