Një mbrëmje plot emocione, festë dhe krenari për 1314 studentët që diplomohen këtë vit akademik:
750 në programet BA
77 në programe me karakter profesional
19 në programin e integruar MSH Drejtësi
dhe 468 në MSH & MP
Në fjalën e tij përshëndetëse, Rektori, Prof. Dr. Tonin Gjuraj, theksoi rëndësinë e arsimit publik dhe rolin e universitetit në zhvillimin e shoqërisë, duke kujtuar fjalët e Kofi Annan:
“Dija është pushtet. Informacioni të çliron. Edukimi është premisë e përparimit, në çdo shoqëri, në çdo familje.”
Ai u shpreh se diploma që studentët marrin sot është më shumë se një dokument arritjeje — është një ftesë për të vazhduar të mësojnë, të krijojnë dhe të kontribuojnë.
“Shkodra, me traditën e saj të pasur arsimore dhe shpirtin e saj europian, ka nevojë për ju — për energjinë, idetë dhe vizionin tuaj. Ju jeni ambasadorët e dijes, të qytetit dhe të vetë universitetit tonë. Kudo që do të shkoni, bartni me vete dritën që keni marrë këtu — atë dritë që ndriçon mendjen dhe fisnikëron shpirtin e njeriut.”
Shkodra është me fat që, përmes universitetit të saj, mban në gjirin e vet rininë më aktive dhe më energjike të vendit.
Bashkëpunimi mes Universitetit dhe Bashkisë së Shkodrës ka sjellë një qasje të re ndaj jetës studentore, duke e bërë qytetin një hapësirë gjithnjë e më miqësore e atraktive për të rinjtë, theksoi në fjalën e tij Nënkryetari i Bashkisë, z. Rudin Beka, i cili vlerësoi universitetin si një shtyllë të rëndësishme të identitetit qytetar.
Ceremoninë e nderoi me praninë e tij edhe z. Dritan Abazović, kryeministri i parë shqiptar i Malit të Zi , i cili theksoi rëndësinë e bashkëpunimit ndërkufitar në fushën e arsimit dhe kulturës.
Një moment i veçantë iu kushtua Prof. Mirjeta Beqirit, ish-pedagoge e Fakultetit Ekonomik dhe aktualisht pjesë e stafit akademik në Gonzaga University, SHBA .
Ajo ndau çmime monetare për studentët ekselentë, duke dëshmuar lidhjen e fortë që mban me universitetin e saj të parë dhe me Shkodrën.
Ceremonia u përshëndet gjithashtu nga disa studentë e sportistë ekselentë, të cilët ndanë emocionet dhe përvojat e tyre gjatë viteve të studimeve.
Atmosfera e mbrëmjes u mbush me gëzim, emocione dhe entuziazëm, teksa çdo diplomant ngriti kapelën e suksesit drejt qiellit të Shkodrës — simbol i një kapitulli që mbyllet dhe një ëndrre që sapo nis.
