Në kuadër të 12 Majit – Ditës Ndërkombëtare të Infermierëve, Departamenti i Lëndëve Paraklinike në bashkëpunim me Klubin Studentor “Ndihma e Parë”, dhe me mbështetjen e Organizatës Malteser, organizoi një aktivitet simbolik para godinës së Rektoratit të Universitetit të Shkodrës “Luigj Gurakuqi” .
Ky aktivitet kishte për qëllim të shprehte mirënjohjen për përkushtimin dhe sakrificën e infermierëve në kujdesin ndaj pacientëve dhe komunitetit. Me moton “Faleminderit Ju Infermierë” , studentë dhe pedagogë u angazhuan në një nismë sensibilizuese dhe falënderuese, duke vënë në pah rolin jetik të infermierit në sistemin shëndetësor.
Aktiviteti u prit me interes të shtuar nga qytetarët, të cilët përfituan nga shërbime falas si:
matja e tensionit arterial, kontrolli i glicemisë në gjak, vlerësimi i indeksit të masës trupore (BMI)
Qytetarët falënderuan studentët për profesionalizmin dhe gatishmërinë e treguar në ofrimin e këtyre shërbimeve mjekësore bazë .
